અમદાવાદ સહિત ગુજરાતભરની જેલોને બોમ્બથી ઉડાવી દેવાની ધમકી મળતાં રાજ્યના સુરક્ષા તંત્રમાં દોડધામ મચી છે. મળતી માહિતી મુજબ, પોલીસ મહાનિર્દેશક (DGP) કચેરીને અજાણ્યા શખસ તરફથી ઈમેઈલ મળ્યો હતો. ઈમેઈલમાં રાજ્યની જેલોને બોમ્બથી ઉડાવી દેવાની ધમકી આપવામાં આવી હોવાનું જણાવાય છે. આ સંદેશ મળ્યા બાદ રાજ્યની તમામ જેલોમાં સાવચેતીના ભાગરૂપે તપાસ શરૂ કરવામાં આવી છે.
ધમકીભર્યા ઈમેઈલમાં માત્ર જેલોને જ નહીં, પરંતુ ગાંધીનગરની સરકારી કચેરીઓ અને એક મંદિરને પણ નિશાન બનાવવાની વાત લખવામાં આવી હોવાની વિગતો સામે આવી છે. ઈમેઈલમાં ‘2008ને ન ભૂલતા’ એવો ઉલ્લેખ પણ કરવામાં આવ્યો હોવાનું કહેવાય છે. આ સંદેશ ખાલિસ્તાનના નામે મોકલાયો હોવાની માહિતી છે. જોકે, ઈમેઈલ મોકલનારની ઓળખ અને ધમકી પાછળનો હેતુ તપાસનો વિષય છે.
જેલોમાં બોમ્બ સ્ક્વોડ અને ડોગ સ્ક્વોડની તપાસ
ઈમેઈલ મળ્યા બાદ સ્થાનિક પોલીસની ટીમો સંબંધિત જેલ પરિસરમાં પહોંચી હતી. સુરક્ષાના ભાગરૂપે બોમ્બ સ્ક્વોડ અને ડોગ સ્ક્વોડની મદદથી જેલોની તપાસ હાથ ધરવાની કાર્યવાહી શરૂ કરવામાં આવી છે. જેલ પરિસર, આસપાસના વિસ્તારો અને સંવેદનશીલ સ્થળોએ ચકાસણી કરીને કોઈ શંકાસ્પદ વસ્તુ કે પ્રવૃત્તિ છે કે નહીં તે તપાસવામાં આવી રહ્યું છે.
હાલ આ ઘટનાને પગલે રાજ્યભરની જેલોમાં સતર્કતા વધારવામાં આવી છે. તપાસ એજન્સીઓ ઈમેઈલના સ્ત્રોત, મોકલનારની ઓળખ અને તેમાં કરવામાં આવેલા દાવાઓની ખરાઈ કરશે. બોમ્બની હાજરી અંગે કોઈ પુષ્ટિ થયેલી માહિતી સામે આવી નથી. તેથી ધમકીને ગંભીરતાથી લઈને તપાસ અને સુરક્ષા વ્યવસ્થા મજબૂત બનાવવામાં આવી રહી છે. પોલીસ અથવા સંબંધિત સત્તાવાળાઓ તરફથી તપાસનાં અંતિમ તારણો જાહેર થાય ત્યાર બાદ જ ધમકીની વિશ્વસનીયતા અને આગળની કાર્યવાહી અંગે સ્પષ્ટતા થઈ શકશે.
